يــلــومــونــي عـلـه حـبـك

من طرف **امیر الحب** الثلاثاء سبتمبر 15, 2009 6:32 pm

يلوموني عله حبك همه مايدرون

روحي بليه روحك تنحسب ميته

و يلموك عله حبي و اني اعرفك زين
بانفاسك تشمني وكلبك سكنته

ياعشكك بكلبي شلون اوصفه شلون
مثل جفني عله عيني لمن طبكته

أني اهواك بعنف بخبال الاعصار
اهواك بترافه برقة النبته

أحس روحي أحبك كلش من زمان
كبل لاجدنه أدم تبتدي قصته

كبل لا أعرف اسمك أني ما موجود
و بسمي من نطقت ميلادي سجلته

يا نايبيرو روحي بكلبي من مريت
اهتزلك كل كياني و فكري عطلته

أنه بسر ارد اخبرك كبل ما حاجي
ولو شيخبي كلبي عيوني فاضحته

بحبك ما دخت ما خططت فد يوم
عله كصتك شفت مكتوبلي انته

و عله كصتي شفت أني الك مقسوم
لئن وجهك مرايه ووجهي عاكسته

لذلك ما ألوم الناس من يحجون
مدريهم بعمري لعمرك نذرته

يانسمه غرام ومرت بمخنوك
ياشمعة فرح يادفو وسط اشته

يالعيد الجبير الماله أخر يوم
يا أجمل جميل بدنيتي عرفته

ياضحكتك عندي التسوه هذا و ذاك
كيتار وكمان وناي سكته

من خصلات شعرك ليل الليل
وصدرك من بياضه الكمر خجلته

من تحمر خدودك يستحي التفاح
وورد الجوري شفتينك ملونته

نظراتك طعم ورموشك حبال
ومصيادة عيونك عقلي صايدته

يامملكة طيبه وقلعه احساس
ورد كلبي صبح و ببابك نثرته

ولبستان خيرك كاصد انه اليوم
اكعد حدر فيَه وأبجي بالسكته

و اكوم وبيدي احوش العنب و الرمان
واصيح بعالي صوتي الردته حصلته

امــــ الحب یــر